မိုင်းကိုင်တွင် RCSS နှင့် မြောက်ပိုင်းမဟာမိတ်တပ်ပေါင်းစုတို့ တိုက်ပွဲဖြစ်ပွား

ယနေ့ ၂၀၂၁ ခုနှစ် စက်တင်ဘာလ ၁၄ ရက်နေ့မှာ သျှမ်းပြည်တပ်မတော်  RCSS/SSA နှင့် SSPP/SSA ပါဝင်သော မြောက်ပိုင်းမဟာမိတ်ပူးပေါင်းတပ်တို့ သျှမ်းပြည်တောင်ပိုင်း မိုင်းကိုင်မြို့နယ် ဟိုခိုက်ကျေးရွာအုပ်စု ပျန်ဆာတောင်ကြော ပျဉ်ဝမ့်ကျေးရွာအနီးတွင် တိုက်ပွဲဖြစ်ပွားခဲ့သည်။

ရှမ်းပြည်တပ်မတော် SSPP/SSA နှင့် မဟာမိတ်ပူးပေါင်းတပ်တို့က ယနေ့နံနက် ၈:၄၅ အချိန်ခန့်တွင် RCSS/SSA ထိန်းချုပ်နယ်မြေ ပျန်ဆာတောင်ကြောမြောက်ဘက်တွင် လှုပ်ရှားနေသည့် သျှမ်းပြည်တပ်မတော် RCSS/SSA တပ်စခန်းကို တပ်ပေါင်းစုဘက်က အင်အား ၄၀၀ ခန့်ဖြင့် စစ်ကြောင်းနှစ်ကြောင်းခွဲကာ စတင်ထိုးစစ်ဆင်တိုက်ခိုက်ခဲ့သောကြောင့် နှစ်ဖက်တပ်များ တိုက်ပွဲပြင်းထန်စွာ ဖြစ်ပွားခဲ့သည်။

တိုက်ပွဲဖြစ်ပွားမှုနှင့် ပတ်သက်ပြီး RCSS/SSA ပြောရေးဆိုခွင့်ရှိသူ ဗိုလ်မှူး ခမ်းစံက – တိုက်ပွဲဖြစ်တာ ဟုတ်ပါတယ်၊ ဒီမနက် (၈) နာရီလောက်က ခုလက်ရှိချိန်ထိ (ယနေ့နေ့လည်ပိုင်းထိ) တိုက်ပွဲဖြစ်နေတုန်း၊ မြေပြင်သတင်းအချက်အလက်ကတော့ ကျွန်တော်တို့လဲ မသိရသေးဘူး ဟု သျှမ်းသံတော်ဆင့်သတင်းကို ယခုလို ဖြေကြားထားသည်။

တိုက်ပွဲတွင်း နှစ်ဖက်တပ်များ ထိခိုက်ကျဆုံးမှု အသေးစိတ်အချက်အလက်ကို မသိရှိရသေးပေ။

ယနေ့ နေ့လည်ပိုင်းအချိန်ထိ နှစ်ဖက်တပ်များ စစ်‌‌ရေးတင်းမာလျှက်ရှိကြောင်း သိရသည်။

ပြီးခဲ့သည့် စက်တင်ဘာလ ၁၁ ရက်နေ့ နှင့် ၁၂ ရက်နေ့တွင်လည်း SSPP/SSA ဦးဆောင်သော မြောက်ပိုင်းမဟာမိတ်ပူးပေါင်းတပ်တို့သည် သျှမ်းပြည်မြောက်ပိုင်း ကျောက်မဲခရိုင် ကျောက်မဲမြို့နယ် ကိုင်တိုင်ကျေးရွာအုပ်စု ဟူးနန်းကျေးရွာအနီးတွင် လည်းကောင်း၊ သီပေါြမို့နယ် အုမ်မုကျေးရွာအုပ်စု မန်လွယ်ကျေးရွာဘက်တွင်လည်းကောင်း သျှမ်းပြည်တပ်မတော် RCSS/SSA တပ်ဖွဲ့အား အင်အားအလုံးအရင်းဖြင့် နှစ်ရက်ဆက်တိုက် ပြင်းထန်စွာထိုးစစ်ဆင်ခဲ့ကြောင်း သတင်းရရှိသည်။

Taifreedom