မိုင်းနင်ဒေသခံများကို SSPP အစည်းအဝေးဆင့်ခေါ်ကာ ခြိမ်းခြောက်

သျှမ်းပြည်တောင်ပိုင်း လွိုင်လင်ခရိုင် ကျေးသီးမြို့နယ် မိုင်းနင်ကျေးရွာအုပ်စု အုပ်ချုပ်ရေးမှူးများကို အစည်းအဝေးဆင့်ခေါ်ကာ မာရှယ်လောအသုံးပြုပြီး ကျေးရွာတွင်း ဝင်ထွက်သွားလာခြင်းကို ဟန့်တားကာ ခြိမ်းခြောက်မှုများ ပြုလုပ်နေကြောင်း သိရသည်။

အမည်မဖော်လိုသူ ဒေသခံတစ်ဦး၏ ပြောကြားချက်အရ – လွန်ခဲ့တဲ့ နှစ်ရက်သုံးရက်က ရှမ်းပြည်တပ်မတော် (SSPP/SSA) အဖွဲ့သည် မိုင်းနင်ကျေးရွာအုပ်စု အုပ်ချုပ်ရေးမှူးများကို ကုန်းပျက်ကျေးရွာသို့ အစည်းအဝေး ဆင့်ခေါ်ပြီး ‌ဒေသခံများကို အလုပ်ချိန် နံနက် ၆ နာရီမှ ညနေ ၆ နာရီအချိန်မှလွဲပြီး ညအချိန် မာရှယ်လော အိမ်ပြင်မထွက်ရနှင့် ကျေးရွာတွင်းသို့ ဝင်ထွက်သွားလာမှုကို ဟန့်တားထားမည်ဖြစ်ကြောင်း၊ ညအချိန်ဝင်ထွက်သွားလာသူများကို တွေ့ရှိပါက SSPP/SSA တပ်သားအဖြစ်ရာသက်ပန်စုဆောင်းခြင်းခံရမည်ဖြစ်ကြောင်း ခြိမ်းခြောက်ထားသည် ဟု ဆိုသည်။

ထို့ပြင် ဒေသတွင်း၌ တူမီးသေနတ် ကိုင်ဆောင်ခွင့်မရှိဘဲ စစ်ဆေးတွေ့ရှိပါက SSPP/SSA အဖွဲ့ထဲ ရာသက်ပန်စစ်မှုထမ်းရမည်၊ ရွာနီးနား တိုက်ပွဲ သို့မဟုတ် ပစ်ခတ်သံများထွက်လာပါက တိုက်ပွဲဖြစ်ပွားရာအနီးရှိ ကျေးရွာများကို မီးရှို့ဖျက်ဆီးပစ်မည် နှင့် ပစ်ခတ်မှုများကြောင့် SSPP/SSA တပ်သားများ ကျဆုံးမှုရှိပါက ရွာသားများဘက်မှ ဆွမ်းသွပ်ကအစ တာဝန်ယူပေးရမည် စသည်ဖြင့် ရွာသားများကို အမိန့်ထုတ် ခြိမ်းခြောက်ပြောဆိုထားကြောင်း သိရသည်။

အစည်းအဝေးကို SSPP အဖွဲ့က မကြာခဏဆိုသလို ဆင့်ခေါ်လေ့ရှိပြီး ခြိမ်းခြောက်ခိုင်းစေမှုများပြုလုပ်ကာ သဲခင်း၊ ကျောက်ခင်း လမ်းများပြုပြင်ခိုင်းလေ့ရှိသလို စစ်မှုထမ်း၊ ရာသက်ပန်စစ်မှုထမ်း နှင့် ပြည်သူ့အမှုထမ်းဟုလည်း အမျိုးမျိုးဆင့်ခေါ်ခိုင်းစေနေသောကြောင့် ဒေသခံများ အခက်တွေ့နေကြောင်း သတင်းရရှိသည်။

Taifreedom