မိုင်းငေါ့ဒေသခံ အမျိုးသားတစ်ဦးကို လက်ပြန်ကြိုးတုပ်ပြီး TNLA ဖမ်းဆီးရိုက်နှက်

သျှမ်းပြည်မြောက်ပိုင်း ကျောက်မဲခရိုင် မိုင်းငေါ့မြို့နယ် ချုံးကျေးရွာအုပ်စု ဟင်ဝိုးကျေးရွာတွင် နေထိုင်သည့် အမျိုးသားတစ်ဦးကို တအာင်းပလောင် လွတ်မြောက်ရေးတပ်မတော် TNLA တပ်ဖွဲ့က (၃) ရက်ကြာ ဖမ်းဆီးရိုက်နှက်ခဲ့ကြောင်း သိရသည်။

၂၀၂၁ ခုနှစ် ဇူလိုင်လ ၂၉ ရက်နေ့တွင် ဟင်ဝိုးကျေးရွာတွင်းသို့ TNLA တပ်ဖွဲ့များဝင်ရောက်လှုပ်ရှားပြီး ကျေးရွာတွင်းရှိ လုံးစံဆွေ အသက် (၆၀) ခန့်ကို သျှမ်းပြည်တပ်မတော် RCSS/SSA နှင့် ဆက်သွယ်မှုရှိသည်ဟု စွပ်စွဲကာ ဖမ်းဆီးခေါ်ဆောင်သွားကြောင်း သိရသည်။

TNLA တပ်ဖွဲ့က လုံးစံဆွေကို (၃) ရက်ကြာ ဖမ်းဆီးထားပြီး ဇူလိုင်လ ၃၁ ရက်နေ့ ညနေပိုင်းတွင် ပြန်လွတ်ပေးခဲ့ကြောင်း သိရှိရသည်။

ပြန်လွတ်လာသည့် လုံးစံဆွေ၏ ပြောပြချက်အရ – TNLA တပ်ဖွဲ့က သူ့ကိုလက်ပြန်ကြိုးတုတ်ပြီး ပြင်းထန်စွာ ရိုက်နှက်စစ်ဆေးခံရကြောင်း ပြောသည်။

ရိုက်နှက်စစ်ဆေးမှုကြောင့် လုံးစံဆွေ၏ ခြေ၊ လက် နှင့် ပေါင်ကြောတစ်လျှောက်တို့တွင်   ညိုမဲဒဏ်ရာများဖြင့် ပြည့်နှက်နေပြီး ယခုလက်ရှိမှာ မိုင်းငေါ့ဆေးရုံတွင် ဆေးကုသနေကြောင်း ဒေသခံများ၏ သတင်းပေးပို့ချက်အရ သိရသည်။

ဖြစ်စဉ်နှင့်ပတ်သက်ပြီး အမည်မဖော်လိုသူ ဒေသခံတစ်ဦးက – လုံးစံဆွေက နားနည်းနည်းလေးတယ်၊ ကျပ်သိပ်မပြည့်ဘူး၊ အသက်ကလဲကြီးပြီ အဲ့လိုလူကိုတောင် သူတို့ (TNLA) က ဒီလောက်နှိပ်စက်တာ၊ သူကဘာအဖွဲ့အစည်းနဲ့မှလည်း ဆက်သွယ်မှုမရှိပါဘူး ဟု ပြောကြားသည်။

ထို့ပြင် မိုင်းငေါ့မြို့နယ် ချုံးကျေးရွာအုပ်စု ဟင်ဝိုးကျေးရွာ၊ ချုံးကျေးရွာ (သစ်)၊ ချုံးကျေးရွာ (ဟောင်း) ရှိ စစ်ရှောင်ဒေသခံများ၏ နေအိမ်များကိုလည်း TNLA တပ်ဖွဲ့ဝင်များက သော့ဖျက်ဝင်ရောက် မွှေနှောက်ရှာဖွေမှုများ ပြုလုပ်နေသည်ဟု သိရှိရသည်။

ယခုလတ်တလော ဒေသတွင်း တိုက်ပွဲများငြိမ်သက်သွားသော်လည်း SSPP/SSA နှင့် TNLA တပ်ဖွဲ့တို့ ကျေးရွာအတွင်း သွားလာလှုပ်ရှားနေသောကြောင့် စစ်ဘေးရှောင် ဒေသခံ ရာနှင့်ချီ နေရပ်မပြန်ရဲသေးကြောင်း သတင်းရရှိသည်။

Taifreedom