တန်ဖိုးငွေ ၄၅ သိန်းကျော်တန်ဖိုးရှိ မူးယစ်ဆေးသယ်ဆောင်သူတစ်ဦးကို RCSS/SSA မှ ဖမ်းဆီးရမိ

သျှမ်းပြည်တောင်ပိုင်း လွိုင်လင်ခရိုင် လဲချားမြို့နယ်တွင် သျှမ်းပြည်တပ်မတော် RCSS/SSA တာဝန်ရှိသူများက တန်ဖိုးငွေ ၄၅ သိန်းကျော်တန်ဖိုးရှိ မူးယစ်ဆေးဝါးသယ်ဆောင်သူတစ်ဦးကို သက်သေခံမူးယစ်ဆေးဝါးများနှင့်အတူ ဖမ်းဆီးရမိခဲ့ကြောင်း သိရသည်။

၂၀၂၁ ခုနှစ် သြဂုတ်လ ၂၃ ရက်နေ့တွင် လဲချားမြို့နယ်တစ်နေရာ၌ သျှမ်းပြည်တပ်မတော် RCSS/SSA တပ်သားများ လုံခြုံရေးယူနေစဉ် Mitsubishi အမျိုးအစား SHN 9H-9270 အနက်ရောင် ကားတစ်စီးအား တားဆီးစစ်ဆေးရာ ယာဘစိတ်ကြွမူးယစ်ဆေးဝါး (၇၀,၀၀၀) ပြား စစ်ဆေးတွေ့ရှိသောကြောင့် မူးယစ်ဆေး သယ်ဆောင်သော ယာဉ်မောင်းဖြစ်သူအား ဖမ်းဆီးထိန်းသိမ်းထားကြောင်း သိရသည်။

မူးယစ်ဆေးသယ်ဆောင်သူမှာ အသက် ၃၆ နှစ်အရွယ် စိုင်းအွမ်ခေး ဆိုသူဖြစ်ပြီး လင်းခေးမြို့နယ် ဇာတိဖြစ်ကြောင်း သိရသည်။

အဆိုပါမူးယစ်ဆေးဝါးများကို မိုင်းကိုင်မြို့နယ် တုံလောကျေးရွာအုပ်စုနေ စိုင်းထွန်းနိုင်ဆိုသူထံမှ အခကြေးငွေဖြင့် သြဂုတ်လ ၂၁ ရက်နေ့တွင် သွားရောက်ယူဆောင်လာပြီး ကျေးသီး-မိုင်းနန်း-လဲချားမှတစ်ဆင့် နမ့်စန်မြို့နယ်ဘက်ကို ပို့ဆောင်ပေးရမည်ဖြစ်ကြောင်း၊ ထိုမူးယစ်ဆေးဝါးများကို စိုင်းသီဟဆိုသူက လာရောက်ယူဆောင်မည်ဖြစ်ပြီး စုစုပေါင်း ၄,၅၀၀,၀၀၀ ကျပ် တန်ဖိုးရှိကြောင်း စိုင်းအွမ်ခေးက ထွက်ဆိုချက်ပေးခဲ့သည်။

မူးယစ်ဆေးဝါးသယ်ဆောင်သူ စိုင်းအွမ်ခေးနှင့် သက်သေခံပစ္စည်းများဖြစ်သည့် ယာဘစိတ်ကြွ ဆေးပြား ၇၀,၀၀၀ ပြား၊ ကား (၁) စီးတို့ကို RCSS/SSA တာဝန်ရှိသူများက ဖမ်းဆီးထိန်းသိမ်းထားပြီး သျှမ်းပြည်ပြန်လည်ထူထောင်ရေးကောင်စီ (RCSS) ၏ မူးယစ်ဆေးဝါးပပျောက်ရေး ပေါ်လစီနှင့်အညီ အရေးယူခြင်း နှင့် အကျင့်စာရိတ္တပြုပြင်မွမ်းမံပေးသွားမည်ဖြစ်ကြောင်း သတင်းရရှိသည်။

Taifreedom